පොටේටො පෑන් කේක් (අල පෑන් කේක්) හදමු

පොටේටො පෑන් කේක් (අල පෑන් කේක්) හදමු ! අලුත් විදියකට අර්තාපල් කාලා බලමුද ? මේක හරිම රසයි. හදාගන්නත් ලේසියි. ලොකු පොඩි කවුරුත් ආසවෙයි. පොටේටො පෑන් කේක් (අල පෑන් කේක්) උදේට කන්නත් හොඳයි. එහෙම නැත්නම් ස්නැක් එකක් වගේ තේ එකක් එක්ක කන්නත් රසයි.

පොටේටො පෑන් කේක් (අල පෑන් කේක්) හදමු (වීඩියෝව)

පොටේටො පෑන් කේක් (Potato Pancake)

යුරෝපා රටවල, පොටේටො පෑන් කේක් (Potato Pancake) හරිම ජනප්‍රියයි. රට අනුව කියන නමත් වෙනස් වෙනවා. හදන විදියත් ටික ටික වෙනස් වෙනවා. මේක බේසික් රෙසිපි එකක්. මේ පොටේටො පෑන් කේක් එක රසට කන්නනම්, අලයි ලූනුයි ඉක්මනට පොතු ඇරල, ඉක්මනට ග්‍රේට් (ගාලා) කරලා, ඉක්මනට මිශ්‍රණය හදල, ඉක්මනට තෙල් ටිකක් රත් කරලා ඉක්මනට බදින්න ඕනේ. ඊට පස්සෙ ඉක්මනට උණු උණුවෙම කන්නත් ඕනේ😊 මම අල ගෙඩි දෙකකින් (400g විත‍ර) හැදුවේ. පෑන්කේක් 6ක් (8cm) විත‍ර හදාගන්න පුලුවන්. මේක හරිම සරල රෙසිපි එකක් නිසා ඔයාලට ලේසි පහසු විදියට රෙසිපි එක වෙනස් කරලා හදාගන්න පුළුවන්.

පොටේටො පෑන් කේක් (අල පෑන් කේක්) හදමු (කුකින් ටිප්ස්)

අල පොතු ඇරල ටික වෙලාවක් වතුරේ දාලා තියන්න, පාට වෙනස් වෙන එක වැලකෙනවා.
අල ග්‍රේට් කරනකොට මම සයිස් එක වෙනස් ග්‍රේටර් දෙකක් පාවිචිචි කලා. එහෙම කලාම, එතනින් මෙතනින් පුංචි පුංචි කෑලි හැපෙනකොට හොදයි. ඒත් නොකලත් ප්‍රශ්නයක් නැහැ.
දුඹුරු පාට වෙන එක වැළැක්වීම සදහා අලයි ලුනුයි මාරුවෙන් මාරුවට ග්රේට් කරන්නත් අමතක කරන්න එපා.
ග්රේට් කරපු අල වලින් පුලුවන් තරම් වතුර ඉවත් කරන්න. ඒත් එක හරිම ඉක්මනින් කරන්න. ටිකක් වතුර ගතිය තිබුනට ලොකු ප්‍රශ්නයක් වෙන්නෙ නැහැ. මොකද අපි මිශ්‍රණයට බිත්තරකුයි පිටි ටිකකුයි එකතු කරනවනෙ.
පිටි එකතු කරනකොට අවම පිටි ප්‍රමාණයක් ඒකතු කරලා මිශ්‍රණය හදාගත්තම අල පෑන්කේක් එක රසයි. දියාරු වැඩි නම් තව ටිකක් පිටි වැඩිකරන්න. ගොඩක්ම තික් බැටර් එකක් කරගන්නත් එපා.
තෙල් ටිකක් වැඩිපුර දාල බැදගත්තම වටේ ක්‍රිස්පී වෙනවා, රසත් වැඩි වෙනවා.

පොටේටො පෑන් කේක් (අල පෑන් කේක්) රෙසිපිය

අවශ්‍ය දේවල්

අල ගෙඩි 2
ලූනු ගෙඩි 1/4
බිත්තර 1
පිටි මේසහැදි 4
ලුණු/ගම්මිරිස්‌ (රස අනුව )
තෙල් (බැද ගැනීමට)

මිශ්‍රනය හදාගනිමු

දුඹුරු පාට වෙන එක වැළැක්වීම සදහා අලයි ලුනුයි මාරුවෙන් මාරුවට ග්රේට් කරන්න. වතුර ගතිය වැඩිනම් හැන්දකින් පුලුවන් තරම් වතුර ඉවත් කරන්න.
ගා ගත් අල ටික භාජනයකට දාල, ලුණු, ගම්මිරිස්‌ සහ බිත්තරය එකතු කරන්න කලවම් කරන්න.
දැන් පිටි දාලා කලවම් කරන්න. වතුර ගතිය වැඩිනම් තව පිටි හැන්දක් විතර වැඩියෙන් දාල කලවම් කරලා මිශ්‍රනය හරි පදමට හදාගන්න.